شوية لخبطة :)

موضوع: شوية لخبطة :) الجمعة سبتمبر 28, 2012 1:37 pm

اوقات بيكون نفسك تقول حاجة
ف بالك افكار كتير
مش عارف تعبر عن فكرة فيهم
تحس في عندك 100 فكرة
و100 خطة
عايز تنفذها
كلك حماس بقى وهمة
وتيجي وقت التنفيذ
كأن خلاط اشتغل ضربهم كلهم مع بعض
متلخبط وتايه ومش عارف تعمل ايه
ولا اصلا بتفكر ف ايه
طب قلت اكتب اللي بفكر فيه ف ورقة
يمكن اعرف انظم واظبط واخطط
أحس الدنيا اتلخبطت اكتر
وانسى اصلا كنت عايزة اقول ايه !!
ليه ؟
ياترى العقل بيقف؟
ولا دا كسل؟
ولا ايه السبب؟
***
وليه أوقات بيكون في احاسيس كتير متلخبطة ومتناقضة
مابتبقاش عارف فرحان ولا زعلان
حيرة وتوهان وارتباك
عايز تعبر عن كل دا يمكن تعرف توصل للي جواك
وبرضه مش بتعرف!
تلاقي القلم مش بيكتب
زي مايكون خايف يخليك توصل لحقيقة اللي ملخبطك
أو تلاقي نفسك برضه
مش عارف تقول
تنسى الكلام
تنسى عايز تقول ايه
ويمكن تتناسى اللي كنت حاسس بيه!
***
أوقات تطق ف دماغك أفكار مجنونة
نفسك مثلا تتشاقى
تتنطط
أو تلعب بمسدس مية
أو تجيب صواريخ تفرقعها
( مع انك ممكن تكون بتخاف من صوتها )
أو بيبقى نفسك تنط الحبل
أو تنفخ بالونات
وأوقات بيبقى نفسك تجري
لحد مانفسك ينقطع
أو تتمشى لحد ماتلاقي نفسك ف مكان ماتعرفوش
اوقات بتطق ف دماغك تخرج ف عز الشتا والمطر تتمشى ع النيل
وف عز الشمس بيبقى نفسك تروح الأهرامات
اهي حاجة مجنونة غير منطقية وخلاص
بيبقى نفسك ف كتير
حاجات ممكن تكون بسيطة اوي
بس بيبقى نفسك فيها
وبرضه ماتعملهاش
طب ليه؟
بنخاف لحد يقول مجانين؟
ولا بنخاف لنفرح شوية؟
ولا بنخاف من لحظة ندم بعد الفرح اننا استسلمنا لجنوننا؟
وفيها ايه لما نتجنن شوية؟

طب ليه الواحد أصلا بيحس بكدا أوقات؟
****
طب ليه كل دا ؟
هو الواحد اتجنن ولا إيه؟

ههه اكيد اتجنن طبعا

» يلا نضحك شوية
» شوية كاريكاترات لذيذة ؟؟؟؟؟