قصيدة منطقي لهشام الجخ

منطقي لما يبقى يتيم و أمي ويبقى سيد العالمين

منطقي الحُسَّاد هتكتر و العدا و الكارهين

و اللي هيقولك ده شاعر

و اللي هيقولك دا ساحر

و اللى هيقولك دا كافر

واللى يكتب و اللى يرسم

و اللى يكدب و اللى يشتم

منطقى

هى غيره

زى غيرة الوليد بن المغيره

مش كان هيسلم؟!

بس حاجه فى نفسه حَكِّتْ

كبره خلَّى نفسه شَكِّتْ

أصل داء الكبر ده أكبر خطر

بس يعنى الجَنَّه تِعْمَرْ وحدها؟!

حَبَّه فى الجنه و نعيمها

وحَبَّه فى سقر

منطقى

و منطقى لما يبقوا المسلمين حالهم كدا

تطلع ضوافر للعِدا

مادمت مش زارع بإيدك غلتك

و الجوع قرص على معدتك .. فذَلِّتَك

مادمت متشتت و تايه فى الكلام

فين الودان اللى هتسمع كلمتك؟!

و منين يجيلك و ش تحمق ولَّا تغضب

ولَّا ترفع كلمتك؟!

هما مش قاصدين يهينوا المصطفى بحبة صور

هما عارفين إن سَيِّدنا النبى سيد البشر

هما قاصدينك و قاصدينِّى و قاصدين كل جيلنا

و طول ما نتشتت و نتفرَّق و بندارى الحقايق

لسه ياما راح يجيلنا

أما سيدنا النبى ربه كافيه

هو خالقه و مصطفيه

لو كانوا حضروه كانوا عرفوا يرسموه

كانوا هيسموه بعدله و بسماحته و بهدوءه

كانوا شافوا إن الصحابه بتلحق الميه اللى نازله من وضوءه

لو كانوا لحقوه كانوا عرفوا يرسموه

إحنا ما رسمناش نبينا فى العيون

إحنا فهّمناهم إن الدين بتاعنا لا فيه أدب ولا
فيه عمل ولا فيه فنون

اتلهينا باحنا كنا و احنا كنا

و نمنا فى اللى راح يكون

بس احنا فقنا

بجد أسفينلك و راجعينلك

شعبك نشيط طاهر و صافى و تقى

زيك يا سيدنا النبى يابو قلب طاهر نقى

أما اللى واكلاهم غيرتهم فده منطقى

» قصيده روعه لهشام الجخ
» انطردي الان من الجدول لهشام الجخ
» قصيدة (من كام شهر)هشام الجخ
» قصيدة ايزيس هشام الجخ
» قصيدة اديني نجحت هشام الجخ